ፕሮግራሞቻችን
- 1ኛ ክፍል ፕሮግራሞች
- 2ኛ ክፍል ፕሮግራሞች
- 3ኛ ክፍል ፕሮግራሞች
- 4ኛ ክፍል ፕሮግራሞች
- 5ኛ ክፍል ፕሮግራሞች
- 6ኛ ክፍል ፕሮግራሞች
- የወጣቶች እና የአዋቂዎች ትምህርት
- የበጋ (Summer)
- የዓለም ቋንቋዎች ፈተና/ World Languages credit exam
-
የፊደል ገበታ
በ1ኛ ክፍል ተማሪዎች ዲቃላ (ድርብ) ፊደላትን ሳይጨምር 231 የአማርኛ ፊደላትን ይማራሉ። ትምህርቱ ተማሪዎች ፊደላትን በቀላሉ እንዲያስታውሱ በሶስት ሴሚስተሮች ተከፍሎ ይሰጣል።
- 1ኛ ሴሚስተር – 13 ባለሁለት እግር ፊደላት
- 2ኛ ሴሚስተር – 11 ባለሶስት እግር እና እግር አልባ ፊደላት
- 3ኛ ሴሚስተር – 9 ባለአንድ እግር ፊደላት
ከፊደላት በተጨማሪ ተማሪዎች አዳዲስ ቃላትን በመማር የቃላት ክምችታቸውን እና የቃላት አጠቃቀማቸውን ያዳብራሉ።
-
የንባብ ትምህርት
ተማሪዎች የሚዳቆ የደረጃ መጽሀፍትን በመጠቀም የንባብ ችሎታቸውን ያዳብራሉ። ከግዕዝ ፊደላት ጀምሮ የሆሄያትን ድምጽና ቅርጽ እየለዩ በደረጃ ይማራሉ። በአመቱ መጨረሻ 8 የደረጃ መጽሀፍትን በማጠናቀቅ በራሳቸው የአማርኛ መጽሀፍትን ማንበብ የሚችሉ ደረጃ ላይ ይደርሳሉ። መጽሀፍቱ ከተቋሙ ቤተ መጻህፍት ተውሰው በቤት ተጨማሪ ልምምድ ማድረግ ይችላሉ።
-
ግብረ ገብ (ስነ ምግባር)
የስነ ምግባር ትምህርቱ በዋናነት በቃል ይሰጣል። ተማሪዎች ሳምንታዊ የስነ ምግባር መርሆችን ከቤተሰብ ጋር በመወያየት ያጠናክራሉ፣ ከዚያም ለክፍል ያካፍላሉ። የተማሩትን በስዕል ለማቅረብ እና ለማብራራት ይበረታታሉ።
-
ላሜ ቦራ (ከ3–6 ዓመት ዕድሜ ተማሪዎች)
ላሜ ቦራ በተረት፣ በመጽሀፍ ንባብ እና በመዝሙር ተማሪዎችን በደስታ የሚያሳትፍ ልዩ ፕሮግራም ነው። እንዲሁም በልደት ዝግጅቶች ላይ በመሳተፍ ለልጆች አስደሳች የመማር ልምድ ይፈጥራል።

2ኛ ክፍል
የጽሑፍ፣ የንባብ፣ የግብረ ገብ፣ የንግግር፣ የታሪክ እና የባህል ትምህርት
የ2ኛ ክፍልን የሚከታተሉ ተማሪዎች 1ኛ ክፍልን በተሳካ ሁኔታ ያጠናቀቁ ወይም የ2ኛ ክፍል የመግቢያ ምዘናን ያለፉ መሆን ይጠበቅባቸዋል። በዚህ ክፍል ተማሪዎች የጽሑፍ፣ የንባብ፣ የስነ ምግባር (ግብረ ገብ)፣ የንግግር፣ የታሪክ እና የባህል ክህሎታቸውን በተቀናጀ መልኩ ያዳብራሉ።
በጽሑፍ ትምህርት
ተማሪዎች ከቃላት ምስረታ ጀምሮ አረፍተ ነገር፣ ሀረግ፣ ስርዓተ ነጥብ እና መሰረታዊ የጽሑፍ አወቃቀር ይማራሉ። ሀሳባቸውን በግልጽ እና በተደራጀ መልኩ የመጻፍ ችሎታቸውን ያሻሽላሉ።
በንባብ ትምህርት
የንባብ ፍጥነታቸውን እና አንብቦ የመረዳት ክህሎታቸውን ያጠናክራሉ። ከሚያነቧቸው መጽሀፎች ውስጥ አዳዲስ ቃላትን በማውጣት ትርጉማቸውን ይረዳሉ እና በተለያዩ የቋንቋ እንቅስቃሴዎች ውስጥ መጠቀም ይለማመዳሉ።
በግብረ ገብ ትምህርት
ውይይት፣ ንባብ እና ጥያቄ–መልስ በመጠቀም የስነ ምግባር ግንዛቤያቸውን ያሳድጋሉ፤ የተማሩትንም ከዕለት ተዕለት ህይወታቸው ጋር በማገናኘት በተግባር ይተገብራሉ።
በንግግር ትምህርት
ተማሪዎች የንግግር ክህሎታቸውን ለማዳበር የተለያዩ የንግግር ርዕሶችን መሰረት አድርገው ሀሳባቸውን በግልጽነት መግለጽ፣ ውይይት ማድረግ፣ ጥያቄ መጠየቅ እና መመለስ ይለማመዳሉ።
በታሪክ እና ባህል ትምህርት
የኢትዮጵያን ታሪክ፣ ባህላዊ እሴቶች፣ በዓላት፣ ባህላዊ ልምዶች እና የማህበረሰብ ባህርያትን ይማራሉ። ይህም ተማሪዎች ስለ ባህላቸው ግንዛቤ እንዲያዳብሩ፣ ማንነታቸውን እንዲያጠናክሩ እና የባህል ቅርሶችን እንዲጠብቁ ይረዳቸዋል።

3ኛ ክፍል –
የቋንቋ፣ የንባብ፣ የጽሑፍ፣ የንግግር፣ የታሪክ፣ የባህል እና የስነ ምግባር ትምህርት
በ3ኛ ክፍል የሚማሩ ተማሪዎች 2ኛ ክፍል የሚሰጠውን ትምህርት በተገቢው ደረጃ ያጠናቀቁ ወይም በተቋሙ የሚሰጠውን የመግቢያ ፈተና በብቃት ያለፉ መሆን ይጠበቅባቸዋል። በዚህ ክፍል ተማሪዎች የቋንቋ ክህሎታቸውን በተሻሻለ ደረጃ ለማዳበር የተዘጋጁ የትምህርት አይነቶችን ይማራሉ።
በጽሑፍ ትምህርት
ሀሳባቸውን በተደራጀ መልኩ መግለጽ፣ አረፍተ ነገርና አንቀጽ መጻፍ፣ የቃላት አጠቃቀምን ማሻሻል እና መሰረታዊ የጽሑፍ አወቃቀርን ማጠናከር ይለማመዳሉ።
በንባብ ትምህርት
የንባብ ፍጥነታቸውን እና አንብቦ የመረዳት ክህሎታቸውን ያጎለብታሉ። አቀላጥፈው ማንበብ፣ የተረዱትን ሀሳብ በራሳቸው ቃላት ማብራራት እና ከንባብ የሚያገኙትን አዳዲስ ቃላት በተግባር መጠቀም ይማራሉ።
በንግግር ትምህርት
የንግግር ክህሎታቸውን ለማጠናከር የተለያዩ የውይይት እና የንግግር ርዕሶች ይካተታሉ። ተማሪዎች ሀሳባቸውን በግልጽነት መግለጽ፣ በአማርኛ ብቻ አቀላጥፈው መናገር፣ ውይይት ማድረግ እና የተማሩትን ለሌሎች ማቅረብ ይለማመዳሉ።
በየኢትዮጵያ ታሪክ እና ባህል ትምህርት
የኢትዮጵያን ታሪክ፣ ታላላቅ ኢትዮጵያዊያን፣ ባህላዊ እሴቶች፣ በዓላት እና የማህበረሰብ ባህሎችን በመማር ስለ ባህላቸው ግንዛቤ እና ኩራት ያዳብራሉ።
በስነ ምግባር ትምህርት
ደግሞ የኃላፊነት ስሜት፣ ክብር፣ መተባበር፣ ታማኝነት እና መልካም ማህበራዊ ግንኙነት የሚያጠናክሩ ትምህርቶችን በውይይት፣ በንባብ እና በተግባራዊ እንቅስቃሴዎች ይማራሉ።

4ኛ ክፍል
የንባብ፣ የጽሑፍ፣ የንግግር፣ የግብረ ገብ፣ የታሪክ እና የባህል ትምህርት
በ4ኛ ክፍል የሚማሩ ተማሪዎች 3ኛ ክፍል የሚሰጠውን ትምህርት በተገቢው ደረጃ ያጠናቀቁ ወይም በተቋሙ የሚሰጠውን የመግቢያ ፈተና በብቃት ያለፉ መሆን ይጠበቅባቸዋል። በዚህ ክፍል ተማሪዎች የንባብ፣ የጽሑፍ፣ የንግግር፣ የስነ ምግባር፣ የኢትዮጵያ ታሪክ እና የባህል እውቀታቸውን በተሻሻለ ደረጃ ያጠናክራሉ።
በንባብ ትምህርት
የአንብቦ መረዳት ፍኖት መጽሀፍን መሰረት በማድረግ እና ተጨማሪ የደረጃቸውን የሚመጥኑ መጽሀፍት በመጠቀም የንባብ ችሎታቸውን ያጎለብታሉ። በሴሚስተሮቹ ውስጥ ዋና ሀሳብን መለየት፣ የታሪክ ዓላማን መረዳት፣ ገጸ ባህርይን መተንተን፣ መቼትን (ቦታና ጊዜ) መለየት፣ የታሪክ ትልምን መረዳት፣ ምክንያትና ውጤትን ማገናኘት እንዲሁም ማነፃፀር እና ልዩነት መለየትን ይማራሉ። ይህም አንብቦ የመረዳት እና የትንተና ክህሎታቸውን ያጠናክራል።
በጽሑፍ ትምህርት
የቋንቋ መሰረታዊ ክፍሎችን እንደ ስም፣ ግስ፣ የስም ገላጭ፣ የግስ ገላጭ፣ ተውላጠ ስም፣ ምዕላድ፣ መስታጻምር እና ሌሎች የሰዋሰው ትምህርቶችን ይማራሉ። እንዲሁም ከአንቀጽ ጽሑፍ (Paragraph Writing) እስከ የጽሑፍ አደረጃጀት (Essay Writing)፣ ምንባብ፣ የደብዳቤ አጻጻፍ፣ ክርክር፣ ውይይት እና ንግግር በተደራጀ መልኩ ይሰጣል።
በንግግር ትምህርት
ክህሎታቸውን ለማሳደግ የተለያዩ የውይይት እና የንግግር ርዕሶች ይካተታሉ። ተማሪዎች ሀሳባቸውን በስርዓት ማቅረብ፣ በአማርኛ በመተማመን መናገር፣ ክርክር ማድረግ እና በሕዝብ ፊት ራሳቸውን መግለጽ ይለማመዳሉ።
በግብረ ገብ ትምህርት
መልካም ስነ ምግባር፣ ሰብዓዊ እሴቶች፣ ኃላፊነት፣ ለቤተሰብና ለማህበረሰብ ክብር፣ ማንነት እና ሰላማዊ አብሮነት የሚያጠናክሩ ትምህርቶች ይሰጣሉ።
የኢትዮጵያ ታሪክ እና ባህል ትምህርት
ተማሪዎች የኢትዮጵያን ታሪክ፣ ባህላዊ እሴቶች፣ በዓላት እና ባህላዊ ዝግጅቶችን ይማራሉ። እንደ የአድዋ በዓል፣ የኢትዮጵያ አዲስ ዓመት፣ የባህል ቀን፣ የቡሄ በዓል እና ሌሎች የባህል ፕሮግራሞች በተግባር በመሳተፍ ስለ ሀገራቸው የበለጠ ግንዛቤ ያገኛሉ። ይህም ተማሪዎች ማንነታቸውን እንዲጠናክሩ እና በኢትዮጵያዊነታቸው እንዲኮሩ ያግዛቸዋል።

5ኛ ክፍል
የንባብ፣ የጽሑፍ፣ የንግግር፣ የግብረ ገብ፣ የታሪክ እና የባህል ትምህርት
በ5ኛ ክፍል የሚማሩ ተማሪዎች 4ኛ ክፍል የሚሰጠውን ትምህርት በተገቢው ደረጃ ያጠናቀቁ ወይም በተቋሙ የሚሰጠውን የመግቢያ ፈተና በብቃት ያለፉ መሆን ይጠበቅባቸዋል። ፕሮግራሙ ለ10 ወራት የሚቆይ ሲሆን በሶስት ሴሚስተሮች የተከፋፈለ ነው።
በዚህ ክፍል ተማሪዎች የንባብ፣ የጽሑፍ፣ የንግግር፣ የስነ ምግባር፣ የኢትዮጵያ ታሪክ እና የባህል እውቀታቸውን በከፍተኛ ደረጃ ያጠናክራሉ።
በንባብ ትምህርት
የክፍሉን ደረጃ የሚመጥኑ የምዕራፍ መጽሐፎች (Chapter Books) በመጠቀም የንባብ ፍጥነትን፣ አንብቦ መረዳትን፣ የሀሳብ ትንተናን እና የጽሑፍ ይዘትን በጥልቀት የመረዳት ክህሎት ያዳብራሉ። ከሚያነቧቸው መጽሐፎች አዳዲስ ቃላትን በማግኘት የቃላት ክምችታቸውን ያሰፋሉ።
በጽሑፍ ትምህርት
ተማሪዎች የጽሑፍ አጻጻፍን፣ የሶስት ዓይነት ድርሰቶችን፣ ሥነ ቃልን፣ የሀገር ፍቅርን እና የኢትዮጵያ ባህልን በስፋት ይማራሉ። በተጨማሪም አንቀጽና ድርሰት መጻፍ፣ የሀሳብ አደረጃጀት፣ የዘገባ አጻጻፍ፣ የቃለ መጠይቅ ዝግጅት እና የተለያዩ የጽሑፍ ክህሎቶችን ያጠናክራሉ።
በንግግር ትምህርት
ክህሎታቸውን ለማሳደግ የተለያዩ የውይይት፣ የክርክር እና የሕዝብ ንግግር ርዕሶች ይካተታሉ። ተማሪዎች ሀሳባቸውን በአማርኛ በግልጽነትና በመተማመን ማቅረብ፣ ማብራራት እና ሌሎችን በማዳመጥ ውይይት ማድረግ ይለማመዳሉ።
በግብረ ገብ ትምህርት
ተማሪዎች ሰብዓዊ እሴቶችን፣ መልካም ስነ ምግባርን፣ ኃላፊነትን፣ ለቤተሰብና ለማህበረሰብ ክብርን፣ማንነትን እና ዜግነታዊ ግንዛቤን ያጠናክራሉ። ይህም ተማሪዎች መልካም ባህሎቻቸውን እንዲጠብቁ እና ብቁ ዜጎች እንዲሆኑ ይረዳቸዋል።
በየኢትዮጵያ ታሪክ እና ባህል ትምህርት
ተማሪዎች ኢትዮጵያ ማን እንደሆነች፣ በዓለም ላይ ያላትን ታሪካዊ እና ባህላዊ ስፍራ፣ በዩኔስኮ የተመዘገቡ የተፈጥሮ እና የሰው ሰራሽ ቅርሶችን፣ የኢትዮጵያ ነገስታት ታሪክን እና ለማህበረሰብ አስተዋጽኦ ያበረከቱ ኢትዮጵያውያንን ይማራሉ። እንዲሁም በአድዋ፣ በኢትዮጵያ አዲስ ዓመት፣ በባህል ቀን፣ በቡሄ በዓል እና በሌሎች ባህላዊ ፕሮግራሞች በመሳተፍ ማንነታቸውን ያጠናክራሉ እና በኢትዮጵያዊነታቸው ይኮራሉ።

6ኛ ክፍል
የጽሑፍ፣ የንባብ፣ የንግግር፣ የታሪክ፣ የባህል እና የስነ ምግባር ትምህርት
በ6ኛ ክፍል የሚሰጠው ትምህርት ተማሪዎች ከቀደሙት ክፍሎች ያገኙትን የቋንቋ፣ የንባብ፣ የጽሑፍ፣ የታሪክ እና የስነ ምግባር ክህሎቶች በተግባር እንዲጠቀሙባቸው የሚያስችል ከፍተኛ ደረጃ ያለው ፕሮግራም ነው። ትምህርቱ በተግባራዊ መማር፣ በጥልቀት ማሰብ፣ በውይይት እና በማህበረሰብ ተሳትፎ ላይ ያተኮረ ነው።
በጽሑፍ፣ በንባብ፣ በታሪክ እና በስነ ምግባር ትምህርቶች ውስጥ ተማሪዎች ስለ ማንነት፣ ታሪክ፣ ባህል እና ዜግነት ጥልቅ ግንዛቤ እንዲያገኙ የተዘጋጁ ርዕሶች ይካተታሉ። ከሚማሯቸው ርዕሶች መካከል “ኢትዮጵያዊ ማንነቴ”፣ “ኢትዮጵያዊ ማህበረሰባችን”፣ የታሪክ ክንውኖች፣ በኢትዮጵያ ያለው ስነ-ጥበብ፣ የታሪክ ሰሪዎች ግለ ታሪክ፣ የኢትዮጵያ የአመራር ታሪክ፣ የኢትዮጵያ አብሮ መብላትና እንግዳ ተቀባይነት ባህል፣ የኢትዮጵያ ታሪክ በዓለም መድረክ ላይ ያለው ስፍራ፣ እንዲሁም ኢትዮጵያዊነትና አለማቀፋዊ ዜግነት የሚያዳስሱ ትምህርቶች ይገኙበታል።
በተጨማሪም በዚህ ክፍል የንግግር እና የአቀራረብ ክህሎቶች በተግባር ይጠናከራሉ። ተማሪዎች የምርምር ስራዎችን፣ ውይይቶችን፣ ክርክሮችን እና ሕዝባዊ ንግግሮችን በማቅረብ ሀሳባቸውን በግልጽነትና በመተማመን መግለጽ ይለማመዳሉ።
ይህ ክፍል በክፍል ውስጥ ብቻ የሚሰጥ ትምህርት ሳይሆን ተግባራዊ የመማር ልምዶችን ያካትታል። ለማህበረሰባቸው እና ለሀገራቸው መልካም አስተዋጽኦ ያበረከቱ ሰዎችን እንደ ተጋባዥ እንግዶች በመጋበዝ፣ በትምህርት ቤት ወይም በሚሰሩበት ቦታ ከተማሪዎች ጋር የመገናኘት እድል ይፈጠራል። እንዲሁም የታሪክና የባህል ቦታዎች ጉብኝት፣ የተጋባዥ ውይይት መድረኮች፣ የበጎ ፈቃደኝነት ፕሮግራሞች እና የማህበረሰብ ጉብኝቶች ይዘጋጃሉ።
በዚህ መንገድ ተማሪዎች የማህበረሰብ አገልግሎት ለሀገር እድገት ያለውን አስፈላጊነት እንዲረዱ፣ ለሀገራቸው አስተዋጽኦ ያበረከቱ ታላላቅ ሰዎችን እንደ አርአያ እንዲመለከቱ እና ወደፊት ሀገራቸውን ኢትዮጵያን ለማገልገል የሚያስችላቸውን ክህሎት፣ ኃላፊነት እና አመራር ብቃት እንዲያዳብሩ ይረዳቸዋል።
የ6ኛ ክፍል ማጠናቀቂያ እና ምረቃ
ተማሪዎች የ6ኛ ክፍል ፕሮግራምን በተሳካ ሁኔታ ሲያጠናቅቁ ከተቋሙ በይፋ ይመረቃሉ። በዚህ ደረጃ ተማሪዎች በአማርኛ የማንበብ፣ የመጻፍ፣ የመናገር እና የመረዳት ክህሎቶቻቸውን ከማጎልበት ባሻገር ስለ ኢትዮጵያ ታሪክ፣ ባህል፣ ስነ ምግባር እና ማንነት ጥልቅ ግንዛቤ ያገኛሉ። ምረቃውም ተማሪዎች ያገኙትን እውቀት፣ ችሎታ እና ተግባራዊ ልምድ የሚያከብር ሲሆን፣ በወደፊት ትምህርታቸውና በማህበረሰብ ውስጥ ንቁ እና ኃላፊነት የሚወስዱ ዜጎች እንዲሆኑ ያዘጋጃቸዋል።
Youth and Adult Learning Programs
In this section, based on the placement test results taken at the time of registration, the program is designed for youth and adults at various levels — from Beginners to Advanced level. The teaching approach is based on a structured curriculum, focusing on practical application, and it integrates lessons in writing, history, and culture, progressing from simple to complex. It primarily emphasizes the development of speaking skills, incorporating relevant vocabulary and dialogues.
This course for youth and adults, like the other sections, follows a two-hour per week schedule and is delivered both in-person and online.
Curriculum Includes:

የበጋ (Summer classes)
ይህ የትምህርት ፕሮግራም ሀምሌ እና ነሐሴ (July -August) የሚሰጥ ለስድስት ሳምንት የሚቆይ ፕሮግራም ነው። የበጋ ትምህርቱ ዓላማ ተማሪዎች ኢትዮጵያዊ ማንነታቸውን እንዲያውቁ የሚያደርግ በማንነት ግንባታ ላይ ያተኮረ ነው። ከትምህርቶቹ በጥቂቱ፡
- የኢትዮጲያ የባህላዊ የምግብ አሰራር
- የተለያዩ የእጅ ሙያዎች ወይም እደ ጥበብ (ጥጥ መፍተል፣ ዳንቴል ስራ፣ የሹራብ ስራ፣ የወረቀት ክራፍት፣ የጸጉር ስራ፣ጥልፍ መጥለፍ፣እና ሌሎችም
- የሙዚቃ መሳሪያ እና ባህላዊ ውዝዋዜ
- ጭቃ ማቡካት/የሸክላ ስራ
- የቅርጫት ስራ
- የስዕል ትምህርት
- ስነጽሁፍና ተውኔት
- አማርኛ ቋንቋ ለጀማሪዎች የመናገር ክህሎታቸውን የሚያዳብሩበት /Amharic for beginner speeking only/ እንዲሁም ሌሎች ሀገራዊ ጨዋታዎችን ለምሳሌ፡ገበጣ፣ ቅልልቦሽ፣ ገመድ ዝላይ፣ ሰኞ ማክሰኞ እና ሌሎች ጨዋታዎችና ትምህርቶችን ያካተተ ፕሮግራም ነው።
የድህረ ትምህርት ቋንቋ፣ ባህል እና ክህሎት ፕሮግራም
“Abugida After-School Program”
- ከትምህርት በኋላ የሚካሄዱ እንቅስቃሴዎች /Afterschool programs/
ከ ሰኞ–አርብ ከምሽቱ 5:00pm በኋላ ይሰጣል
ተማሪዎች ቋንቋቸውን የሚያዳብሩበት፣ ታሪክ እና ባህላቸውን የሚማሩበት፣ አመራርን እና ተግባራዊ ክህሎትን የሚያበረታቱ የተለያዩ ክለቦችና እንቅስቃሴዎች ላይ መሳተፍ ይችላሉ። ከእነዚህም ውስጥ:-
• የመጽሐፍ ክለብ – የንባብ ልምድ፣ ውይይት እና የመረዳት ክህሎት ማዳበር
• የኢትዮጵያ ታሪክ ክለብ – የኢትዮጵያን ታሪክ፣ እና ቅርስ ማጥናት
• የስነጥበብ ክለብ – በስዕል፣ ቀለም እና ሌሎች የስነጥበብ ስራዎች ፈጠራን ማበረታታት
• የክርክር ክለብ – የመግባቢያ፣ የንግግር እና የጥልቀት አስተሳሰብ ክህሎት ማጠናከር
• የኢትዮጵያ ጂኦግራፊ እና ሳይንስ ክለብ – የኢትዮጵያ መልክዓ ምድር፣ አካባቢ፣ ሳይንሳዊ አስተዋጽኦዎች እና ግኝቶች ማጥናት
• ቅርጫት ስራ ክለብ – ባህላዊና ፈጠራዊ የቅርጫት ሥራ ቴክኒኮችን መማር
• የሸክላ/ጭቃ ማቡካት ክለብ – በሸክላ/ጭቃ አማካይነት የስነጥበብ እና ባህላዊ ስራዎችን መፍጠር
• የስፌት ክለብ – መሠረታዊ የስፌት እና የጨርቃጨርቅ ክህሎቶችን ማዳበር
• የጥጥ መፍተል ክለብ – ባህላዊ የጥጥ ዝግጅት እና የመፍተል ሂደቶችን መማር
• የዳንቴል ክለብ – የዳንቴል ስራ ቴክኒኮችን በመማር ፈጠራና ትዕግሥት ማዳበር
• የጥልፍ መጥለፍ ክለብ – የጥልፍ ሥራ ልምምዶችን በማድረግ አዳዲስ የዲዛይን ፈጠራዎችን መማርና ትዕግስትን ማዳበር
• የኢትዮጵያ ባህላዊ ምግብ ማብሰል ክለብ – የኢትዮጵያ ባህላዊ ምግቦችን፣ የምግብ ባህልን እና መሠረታዊ የምግብ ማብሰል
ክህሎቶችን በተግባራዊ እንቅስቃሴዎች መማር እና ባህላዊ ቅርሶችን መጠበቅ።

ይህ ፕሮግራም ተማሪዎች በመደበኛ ትምህርታቸው የመካከለኛ ደረጃ/Middle school ተማሪዎች በሚሆኑበት ጊዜ የሚወስዱት ፈተና ሲሆን በከፍተኛ ሁለተኛ ደረጃ የትምህርት (high school) ቆይታቸው ሦስት ክሬዲት ማግኘት የሚችሉበት እድልን የያዘ ነው። በአንዳንድ ካውንቲዎች 6ኛ ክፍል ጀምሮ ፈተናው የሚሰጥ ሲሆን ሌሎች ካውንቲዎች ላይ ደግሞ 7ኛ ክፍል ላይ ይጀምራል። የበለጠ መረጃ ለማግኘት የትምህርት ቤታቸውን አማካሪ (Student counselor) መጠየቅ አሊያም የትምህርት ቤቱን ድህረ ገጽ መጎብኘት ያስፈልጋል። ተቋማችን ኢትዮጲያዊያን ተማሪዎች በአማርኛ ቋንቋ እንዲፈተኑ የሚያስችል የአንድ ሴሚስተር ወይም የ2 ወራት ስልጠና ይሰጣል።

